ភ្នំពេញ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី បានឱ្យដឹងថាក្នុងរយៈពេល ៩ខែនៅ ឆ្នាំ២០២៣នេះ រដ្ឋបានផ្ដល់សេវាស្តារលទ្ធភាពពលកម្មកាយសម្បទា រួមជាមួយនឹងកញ្ចប់ឧបត្ថម្ភដល់ជនពិការភាពប្រមាណ ២០ ២៩៣នាក់។

ថ្លែងក្នុងពិធីសម្ពោធជាផ្លូវការនូវគម្រោង ATscale នៅសណ្ឋាគារកាំបូឌីយ៉ាណា ព្រឹកថ្ងៃព្រហស្បតិ៍ ទី២៦ ខែតុលា ឆ្នាំ២០២៣ លោករដ្ឋមន្ត្រី ជា សុមេធី បានលើកឡើងថា រាជរដ្ឋាភិបាលកម្ពុជាបានកំណត់យកវិស័យពិកាពជាអាទិភាព ដោយបានផ្តល់សច្ចាប័នលើអនុសញ្ញាស្តីពីសិទ្ធិជនមានពិការភាព និងលិខិតតូបករណ៍អន្តរជាតិផ្សេងៗ ព្រមទាំងបានកសាង និងដាក់ឱ្យអនុវត្តច្បាប់ គោលនយោបាយ និងលិខិតបទដ្ឋានគតិយុត្តជាតិនិងអន្តរជាតិជាច្រើនទៀត ពិសេសការពង្រឹង ការផ្ដល់សេវាសុខភាព និងសុខុមាលភាពសម្រាប់ជនមានពិការភាពដូចមានចែងក្នុងកម្មវិធីនយោបាយរបស់រាជរដ្ឋាភិបាល នីតិកាលទី៧នៃរដ្ឋសភា សម្រាប់ការកសាង និងការការពារមាតុភូមិឆ្នាំ២០២៣-២០២៨ យុទ្ធសាស្ត្របញ្ចកោណ ដំណាក់កាលទី១។ ក្របខណ្ឌគោលនយោបាយជាតិគាំពារសង្គម ២០១៦-២០២៥ និងការដាក់បញ្ចូលនូវបញ្ហាជួយដល់ជនមានពិការភាពដោយសារមីន ជាគោលដៅអភិវឌ្ឍន៍ទី១៨ នៃឯកសារគោលដៅអភិវឌ្ឍន៍ ប្រកបដោយចីរភាពកម្ពុជា២០៣០ និងផែនការយុទ្ធសាស្ត្រជាតិស្ដីពីពិការភាពឆ្នាំ២០១៩-២០២៣។

លោករដ្ឋមន្ត្រីបានបន្ថែមថា កម្ពុជាកំពុងបន្តនិរន្តរភាពសេវាស្តារលទ្ធភាពពលកម្មកាយសម្បទាសម្រាប់ជនមានពិការភាព ដោយក្នុងរយៈពេល ៩ខែ ឆ្នាំ២០២៣នេះ ជនមានពិការភាពប្រមាណ ២០ ២៩៣នាក់ បានទទួលសេវាស្តារលទ្ធភាព ពលកម្មកាយសម្បទាគ្រប់ប្រភេទដោយឥតគិតថ្លៃ រួមជាមួយនឹងកញ្ចប់ឧបត្ថម្ភរបបគោលនយោបាយសម្រាប់ការធ្វើ ដំណើរ ការហូបចុក និងការស្នាក់នៅ ក្នុងអំឡុងពេលទទួលសេវា និងបានផ្ដល់ឧបករណ៍ទ្រទ្រង់រាងកាយចំនួន ៧ ៦២៦ គ្រឿង។

លោករដ្ឋមន្ត្រីក៏បានឲ្យដឹងដែរថា ក្រៅពីនេះជនមានពិការភាពចំនួន ២ ១៦៧នាក់ ក្នុងនោះស្រីចំនួន ៥១០នាក់ បានទទួលការបណ្តុះបណ្តាលវិជ្ជាជីវៈពីមជ្ឈមណ្ឌលបណ្ដុះបណ្ដាលវិជ្ជាជីវៈរបស់រដ្ឋ លើមុខវិជ្ជាសំខាន់ៗស្របតាមតម្រូវការទីផ្សារនៅកម្ពុជា ខណៈមនុស្ស គ-ថ្លង់ និងពិការភ្នែកចំនួន ៥៥១នាក់ បានសិក្សាភាសាសញ្ញានិងរក្សអក្សរស្ទាបតាមរយៈកម្មវិធីសិក្សារបស់រដ្ឋ និងអង្គការដៃគូ។

លោកថា៖ «និយាយជារួមរាជរដ្ឋាភិបាលបានយកចិត្តទុកដាក់ជាចម្បងលើសុខភាពជនងាយរងគ្រោះ ជាពិសេសជនមានពិការភាព»។

ក្រៅពីនេះជនមានពិការភាពក៏ទទួលបានអត្ថប្រយោជន៍ពីកម្មវិធីជាតិជំនួយសង្គមដែលរដ្ឋាភិបាលបានផ្ដល់ជូនផងដែរ។

បើតាមលោករដ្ឋមន្ត្រី ជា សុមេធី អត្រាជនមានពិការភាពនៅព្រះរាជាណាចក្រកម្ពុជា អាយុ ៥ឆ្នាំឡើងសរុបចំនួន ៦៨៩ ៤៥៧នាក់ ស្មើនឹង ៤.៩% នៃប្រជាជនសរុប (យោងតាមជំរឿនឆ្នាំ២០១៩) ។ មូលហេតុចម្បងៗដែលនាំឱ្យមានពិការភាពគឺ បណ្តាលមកពីជំងឺផ្សេងៗដូចជា កង្វះអាហារូបត្ថម្ភ តំណពូជ គ្រោះថ្នាក់ចរាចរណ៍ គ្រោះថ្នាក់ការងារ គ្រោះថ្នាក់ដោយសារមីន និងយុទ្ធភ័ណ្ឌមិនទាន់ផ្ទុះអំពើហិង្សា គ្រោះមហន្តរាយ និងចាស់ជរាទៅតាមម្រែបម្រួលប្រជាសាស្ត្រនិងសម័យកាល៕